Albòm yo nan wout, Diskòb lage…

Lansman Diskòb Mizik (Sit Web + Aplikasyon mobil ) mache ak anpil nouvote nan endistri mizikal ayisyen an. Sitou nou nan peryòd vakans, atis yo pwofite chofe fanatik yo nan fè kè yo kontan ak nouvo mizik. Apre BélO ki gentan lage, BIC, Rutshelle Guillaume ak Jean Jean Roosevelt gentan gen albòm pa yo ki nan wout tou


BélO fenk lage 6èm albòm li an ki rele : Motivasyon. Chantè angaje, Jean Belony Murat gentan gen 10 lane karyè nan mizik. Se pa yon sekrè pou pèsòn sou kalite talan atis sa, ki ranpòte tit entènasyonal, genyen epi atachman li pou tè Dayiti. Motivasyon gen 10 mizik sou li : Bousòl, Ti gason, Eda (Ki sou albòm Michael Brun an tou) , Gran nèg… pou n site sa yo sèlman. Vant siyati albòm lan ap fèt Jedi 8 out 2019 nan FUBAR.

BIC, tizon dife a, pare yon albòm ki mache ak nivo koutplim li. Biksyonè, se ak non sa atis lan gentan fè anpil tizè mizik brake je sou li pou tann sa gwo lirisis lan gen nan djakout li. Dapre atis lan, albòm sila ap tankou yon diksyonè ki rasanble seri de mo divès kouche nan sosyete a pa itilize menm jan. Atis la t deja ba nou “Vokabilari“, albòm sila ap gen pou l suiv menm liy lan. Depi premye dawou, fanatik yo ap ka dekouvri Biksyonè. Men annatadan, atis lan kòmanse lage kèk mizik pou piblik lan ka fè yon ti goute. 

Jean Jean Roosevelt deside mete grif li deyò nan Albòm li an kap rele “Grenadye Alaso“. Se plis pou reveye konsyans pifò ayisyen pa rapò ak rapò peyi an ak entènasyonal lan atis lan pwodwi albòm sila. Premye vant siyati albòm sila ap fèt 10 dawou nan vil kote atis lan sòti ,Jeremi. 

Twazyèm albòm Rutshelle GuillaumeQuoiqu’il advienne” nan wout tou. Pa bliye Rutshelle gentan gen 2 albòm li yo (Émotions, Rebelle) ki disponib sou platfòm Diskòb Mizik. 

Diskòb Mizik ap tann de bra louvri tout albòm sa yo ak pa divès lòt atis. Rete pou yo disponib sou platfòm lan pou piblik lan ka tande yo alèz.