Albòm Chango a pare e li Fè l an kreyòl…

Ane sa, mwa Oktòb la ki se mwa kreyòl,pran pèp la nan lari. San di pètèt, 28 Oktòb ki se Jounen Entèmasyonal lang kreyòl ap yon lòt jounen mobilizasyon nan batay pou chavire chodyè an. Pandanstan, sa pa anpeche kèk enstitisyon ak kèk moun jwenn yon fason pou yo selebre kreyolofoni. Se nan menm lide sa, Guerchang Bastia, ki toujou akonpaye pèp la nan lari a, te deside make jou sa ak prezantasyon premye albòm li : Fè l an kreyòl !

Nan sans sa Sanba a te planifye yon Sesyon Ekout nan Jaden Samba jou 28 Oktòb la men malerezman sitiyasyon peyi lòk la lakoz aktivite sa pa rive posib. Men atis la bay garanti albòm nan ap disponib sou tout platfòm yo a pati demen 29 oktòb la. Pandan n ap tann, nou pran plezi prezante w atis la epi pataje ti koze ak ou sou albòm lan.

Geurchang Bastia gen 31 lane, li se yon atis ki fèt nan vil Ench, ki te blije rantre Pòtoprens pou li vin lekòl epi etidye sosyoloji nan fakilte syans moun. Sa pa gen lontan, Guerchang deside adopte yon non vamyan: Chango.. Apre yon zanmi li ki rele Nora Joanne Joseph ta pral rele l konsa pou premye fwa , li tou adopte non an. Premye rezon daprè atis la, se paske li soti nan non l, anpi tou Chango se non yon lwa nan fanmi OGOU ki senbolize lajistis.

Sou menm sijè a : Jenerasyon Envensib : 7 lane batay, 7 lane mizik (Premye Pati)

Li te twouve pwojè mizikal li yo ale nan demach sa , li menm ak estaf li te deside batize l sou non Chango, yon non ki gen plis sans nan lavi mizisyen l e ki marande ak batayè li ye a.
Istwa Chango ak mizik, kòmanse depi lakay li ak papa l ki se yon anmoure mizik, ki vin ba l gou pou mizik. Depi lò a pasyon li tanmen pou mizik. Li te komanse ak yon gwoup RAP nan vil Ench , lè sa li te gen 13 lane. Lè li vin rantre Pòtoprens li kòmanse nan pwodwi pwòp mizik li ,depi an 2012 pou jouk rive jounen jodi a. Li pwodwi plis pase 10 mizik pami yo 6 kanaval sou leta.

Nan Nivo pwodiksyon, albòm lan fèt sou rit rege melanje ak vodou. Yon melanj ki vin akouche 13 mizik, e li gen plizyè atis envite tankou Shoomy, Mirla ak Didier Awadi ki se yon rapè senegalè. Daprè Chango, albòm « Fè l an kreyòl » bati sou lide batay pou respekte sa nou pote kòm moun nan listwa limanite ak kilti nou. Se yon batay kont pwojè neyokolonyal la ki refize rekonèt nou kòm moun ak diferans nou. Epitou se yon batay pou ayisyen kapab eksprime lide l ak kilti l nan lang nou lib e libè. « Fè l an kreyòl” se yon lòt pwopozisyon , yon lòt fason pou nou batay.

Gen plizyè tèm kit trete anndan albom sila a, tankou chomaj ki ap ravaje peyi a ,kesyon batay fanm yo ap mennen pou dwa yo, lamizè, sou lanmou, rezistans, sou listwa nou , inite nan karayib la, li pale tou sou chanjman klimatik la. Yon latriye tèm ki bay posiblite pou reflechi sou sitirasyon nou twouve nou jodi an.

Pandan w ap tann albòm lan disponib sou Diskòb, kontinye swiv atis la sou tout rezo sosyal yo instagram ak Twitter :@guerchango, facebook : Guerchang Chango, epi gade , pataje dènye videyo li a ki sou youtube pandan w ap tou abòne ak chèn li a.

Alexa Cabeche

Kite yon kòmantè