Dug G pral pote “Vibe la” nan lakou Brezil

Pou mwa desanm sila, moun Brezil pral gen kichòy nan men yo. Dug G ap pote Vibe Li an nan peyi sila kote li pral fè yon virewon nan divès kote tankou Rio De Janeiro, Santos ak Sao Paulo.

Kat afich gentan konfime pou atis lan ki pa kache kontantman pou l al pèfòme nan peyi Pele ak Ronaldo an. « Se te toujou yon rèv pou mwen pou m al vizite Brezil. Gen yon rapwochman nan Kilti nou ak yo. Mwen te toujou vle jwi yon Eksperyans konsa». Atis lan gen pou l jwe nan inivèsite pou yon piblik brezilyen.

Ane 2019 lan sanse ta dwe byen fini pou atis lan. «Virewon sa se pi bèl kado Bondye te ka ban mwen. Li remonte moral mwen. », se sa Dug G di nou. Atis lan tou pwofite remèsye CCHB (Maison Culturelle de Brésil en Haïti) , ki se ekip ki òganize virewon sila. Dug G pral fè sa li plis renmen an, li pral travay pandan l ap voye mizik ayisyen an pi wo.

Dug G konsyan fanatik li yo bouke tann li. Konjonkti peyi a ak mank estrikti nan mizik pa t fasilite l delivre bon komisyon pandan ane sa. Men Atis lan pwomèt yon videyo avan virewon nan Brezil lan tanmen. « Videyo sila ta dwe sòti apre kanaval men lakoz sitiyasyon peyi a sa pa te rive fèt ». Gen yon albòm nan wout pou ane 2020 an, selon sa atis lan di.

Nèg Pòdpè, youn nan pilye nan Rap Kreyòl lan, Dug G toujou ap pwodwi pandan mouvman an ap grandi. Sa fè atis lan plezi kote li remake gen pwomotè ayisyen ki toujou kwè nan atis ki te fè wout pou Rap Kreyòl lan. « Si Dug G te egoyis, Rap Kreyòl pa t ap kote li rive la. Mwen fyè de tout jèn k ap fè rap jounen jodi a ».

Dug G ki se yon abitye nan zafè al jwe deyò peyi a pwomèt yon prestasyon wòdpòte pou virewon Brezil la. Dapre sa li di, gen lòt virewon ki nan wout toujou pou lòt peyi pou ane 2020 an.

Mizik Dug G yo gentan disponib sou aplikasyon Diskòb lan. Nou ka toujou telechaje aplikasyon an ki disponib sou Android ak Ios.

Ios>>> https://apps.apple.com/us/app/diskob/id1484522072

Android>>> https://play.google.com/store/apps/details?id=com.thinkinnov.diskob