Manno Beats pwofèt nan peyi l

Yon lòt fwa ankò, atis nou yo pa sispann depase yo nan mond mizikal la, kounyè a se tou pa Manno Beats ki se yon atis ki chaje talan nan djakout li, yo konnen li kòm yon moun ki konn fe beat, chante, li konn fè videyo e li pwodwi kèk atis tou. Dènye pwojè li a se te yon bèl e yon gwo kout volan pou mizik ayisyen an ,pwojè sa daprè sa li di gen yon lane nan kwizin e se nan dat ki te 30 jiyè a pwojè a resi ateri.

Pwojè sa rele ”Akouna” ki se yon kolaborasyon mizikal ant Afrik ak Ayiti kote nou ap jwenn Manno Beats ki direktè pwojè a an kolaborasyon ak Afrotonix ki se yon atis afriken ki sòti Tchad e li te eli meyè dj afriken nan All Africa Music Awards epi Vox Sambou ki se yon anbasadè mizik tradisyonèl ayisyen nan mond lan.

Nan mizik sila wap jwenn yon melanj de Kreyòl ayisyen, arab ,fransè epi yon lang ki rele sar ,yon melanj ki pote anpil koulè ak divèsite nan mizik ayisyen an epi se yon fason tou pou nou dekouvri lòt kilti yo pandan nou ap chante pou lanmou. Anplis de sa nou jwenn yon bèl videyo, li fèt nan de peyi kote youn nan peyi sila yo se Tchad e yon bon pati fèt nan dezè Sahara, avèk abiman afriken atis yo fè sòti kilti pèp nwa e yo rete egal ak yo menm.

Manno Beats pa rete la senpman ak pwoje sa, gras ak mizik sila a li arive nomine nan All Africa Music Awards (AFRIMA) ki se yon gwo konkou ki ap fèt an Afrik. Li se sèl atis ayisyen ki rive nomine nan yon konkou ki ap fèt an Afrik e pou atis afriken, men li te rive pase e soumèt mizik li a nan konkou sa paske li te rive pwouve li gen orijin li ki soti nan peyi Tchad.
Li nomine pami yon bann lòt gwo atis entènasyonal e se nan de kategori.

Atis la te fè anons sa sou paj enstagram li 28 dawout ki sot pase la e ap mande pou fàn li yo ak pèp ayisyen an vote l e ride li rive pi lwen nan konkou sa paske vòt yo ap ede li a 50% pou li rive e menm pran premye pri a. Yo ap remèt pri yo jou ki ap 23 novanm ki ap vini an nan peyi Nijerya.

Pa ezite al koute, pataje, abone ak chèn youtube Manno Beats la epi vote pou li nan afrima.org. Epi swiv li sou tout rezo yo pou nou ka fe chimen avèk li e konn tout sa kap pase. Ann kontinye voye kilti nou, mizik nou ak atis nou yo janbe fwontyè .

Alexa CABÈCHE

Kite yon kòmantè