Si w renmen mizik, kite Joël « Influences » w…

Si nou konnen l gras a Akoustik Band, mpanse li lè pou nou dekouvri kiyès Joël ye. Nou tout konnen li sou non Joël Akoustik, men bon non li se Joël Pierrevil, li fèt nan lakou Pòtoprens nan dat 5 sektanm 1988, li se premye pitit nan fanmi l e li gen sèlman yon ti frè.

Si pou anpil lòt, enfliyans mizik yo soti anndan fanmi yo, Joël li menm se eksepsyon nan règ la. Se nan 14èm lane li, mizik komanse ap ba l tiz. Li komanse aprann jwe gita epi antre nan koral. Sou enfliyans yon pi gran pase l ki te nan menm lekol avè l, li te vin enterese epi swiv chimen mizik. Pou Joël , mizik se yon kout loray ki tonbe sou li e ki tou kale l.

Li tanmen karyè pwofesyonèl li nan lane 2012 ,kote li te konn ap chante ak Hans Peters, 2 lane aprè , li menm ak zanmitay li Elder t ap al mete sou pye yon gwoup mizik ki se Akoustik Band, gwoup ki deja gen plizyè lane ap frape, e li gen plizyè pwojè ak gwoup sila. Men li te deside sòti yon pwojè poukont li. Pwojè li komanse panse depi Oktòb lane pase , men se nan mwa dawout la li komanse kwit li.15 Novanm ki sot pase la, Joël soti pwojè sila. Yon EP ki pote non “Influences“. Se tout yon varyete mizikal Joël pwopoze nou nan pwojè sila, yon konpa djaze, yon son karibeyen.Pou Joël pwojè sila se yon fason pou l pale de li e pou arive fe moun yo wè tèt yo nan sa li santi. Pwojè sila gen 5 mizik sou li.

Nou jwenn yon premye tit ki se “La pou ou” ,mizik ki pote yon flanm lespwa pou tout sa ki vle dekouraje, pou tout moun vag lavi vle pote ale, mizik sa se ka petèt prefere ou, men Joël pa rete la , li pwopoze nou “Pi wo” an dezyèm pozisyon, yon mizik sou yon rit kreyòl ki ap leve peyi nou pami gran yo. Touswit aprè n ap jwenn “C’est quoi le probleme” Joël fè yon chavire nan lang fransè a pou li montre nou jan nou beni ak sa nou genyen , li ap swiv li ak “Kontan”, yon remèsiman pou l di fanatik li yo jan li santi l beni. Dènye mizik la se ”Kijan” yon mizik ki pale ak moun, nan jan nou bati relasyon nou ak tèt nou, ak lot moun tou, Joël di nou ret chita pa mennen pyès kote e envite nou pran bagay yo tipa tipa.

Yon ansanm sijè ki youn pi enteresan pase lòt , se nan lide sa Joël akouche pwojè sila pou l pote vwa pa l. Pou li mizik ka chanje moun, e li swete vwa l ak pawol li ka pote yon chanjman nan lavi chak moun ki tande l e pote yon di plis nan sosyete a. Kite Joël enfliyanse w ak mizik li, kontinye koute “Influences” sou Diskòb Mizik ,pataje l ak zanmi epi kontinye fe chimen ak Joël Akoustik sou Twitter ak Instagram .

Nou kapab telechaje aplikasyon Diskòb Mizik la jodi a menm.

Ios>>> https://apps.apple.com/us/app/diskob/id1484522072

Android>>> https://play.google.com/store/apps/details?id=com.thinkinnov.diskob

Alexa CABÈCHE