Tout moun sou Konpa…

Mwa Jiyè ki sot pase a fè konpa 64 lane depi ayisyen marye avè l. Diferan tenò ki pase rive reprezante l nan plizyè peyi. Konpa se youn nan richès nou. Nan okazyon an, plizyè refleksyon rive fèt pou make dat la. Palman an menm deklare 26 Jiyè jounen Konpa!

Lakoz kontèks difisil n ap konnen nan peyi a, aktivite bal yo potko tanmen nòmalman. Men, depi kèk jou, tizè mizik yo kòmanse sòti lannwit, epi gwoup yo kontinye ap selebre konpa nan memwa Nemours Jean-Baptiste.

Plizyè gwoup konpa fete nan menm epòk sa. Ane sa bay gwoup Klass 7 lane depi l ap fè moun danse konpa anndan kou deyò peyi. Yo gentan bay 3 gwo albòm pou 7 lane sa yo : Fè l vini avan, Fè l ak tout kè w epi dènye a, Ret nan liy ou.

T-vice, youn nan gwoup tenò yo, rive depase yon ka syèk nan konpa. Gwoup sa se yon gwo Eritaj, Roberto ak Renaldo Martino, ap kite pou mizik ayisyen an. Se yon tradisyon pou gwoup lan selebre nan yon sware an blan anivèsè yo. «Mèt Beton an» gentan gen 27 lane ap depoze konpa.

Harmonik pral fete 11 lane li 9 dawou ki ap vini la. Jere m, Diferan, Let’s Go ak Respè, se 4 albòm sa yo gwoup la gentan pwodwi pou egzistans yo nan Konpa.

Plen lòt gwo gwoup konpa ki chaje ak eksperyans nan mizik ayisyen an. Yo fè anpil efò pou tandans sa rive Pete plafon. Genyen ki ap vini tou, yo ap bezwen sipò nou.

Diskòb vle pote kontribisyon pa l nan pèmèt zèv yo disponib an liy. Se pou sa l mande tout atis, manadjè, pwodiktè ak tout lòt moun ki nan metye mizik yo konsilte dokiman sa https://diskobmizik.com/faq/ ki disponib sou sit la www.diskobmizik.com pou plis enfòmasyon !

#KoutePatajeViv
#MizikNouVivLi


Kredi Foto : Le Nouvelliste